ຫ່າຝົນຕົກໂດຍບັງເອີນໃນຕອນເຊົ້າໄດ້ເຮັດໃຫ້ທັດສະນີຍະພາບຢູ່ອ່າວ ຮ່າລອງ ຍິ່ງມີຄວາມ ສວຍງາມແບບເລືອນລາງພ້ອມກັບກຳປັ່ນສີຂາວຫຼາຍລຳ ແລະ ສາຍພູຫີນປູນໃນທ່າມກາງ ເມກໝອກສະຫຼົວ...

ພວກຂ້ອຍໄດ້ມາເຖິງທ່າກຳປັ່ນບ່າຍເທີ ແລະ ບໍ່ດົນປານໃດ ຝົນກໍຄ່ອຍໆເອື້ອນ, ເມກຂາວເລີ່ມປະກົດຂຶ້ນ. ກຳປັ່ນທ່ອງທ່ຽວ 3 ດາວ ບ່າຍເທີ ຂາວຄືຫົງໃຫຍ່ໂຕໜຶ່ງລໍຖ້າຢູ່ທ່າກຳປັ່ນ. ຜູ້ບໍລິຫານກຳປັ່ນບ່າຍເທີ ເລຊວນຮວ່າ ຕ້ອນຮັບພວກຂ້ອຍດ້ວຍຄວາມໃກ້ຊິດ, ພວກຂ້ອຍຮູ້ສຶກ ຕື່ນເຕັ້ນທີ່ຈະໄດ້ເປັນ “ເທວະດາ” ໃນການລ່ອງເຮືອ 2 ວັນອອກກາງທະເລ.


 ກຳປັ່ນ ບ່າຍເທີ ພາພວກຂ້ອຍໄປຫາເຂດທ່ອງທ່ຽວທີ່ໄດ້ຮັບຮອງເປັນມໍລະດົກທຳມະຊາດຂອງໂລກ 2 ຄັ້ງ. ງານລ້ຽງໄດ້ຈັດຢູ່ຊັ້ນ 3 ຢ່າງຮຽບ ຮ້ອຍແຕ່ບໍ່ເຫັນຜູ້ໃດເຂົ້າມານັ່ງຈັກຄົນ, ຜູ້ໃດກໍຢືນຊົມເບິ່ງທິວທັດຂອງອ່າວຢູ່ລະບຽງເຮືອ. ເຖິງວ່າເຄີຍມາອ່າວຮ່າລອງຫຼາຍເທື່ອແລ້ວ, ແຕ່ສຳລັບຄັ້ງນີ້ ຂ້ອຍຮູ້ສຶກແປກໆ “ ຮ່າລອງ ປ່ຽນແປງແນວໃດຫຼັງຈາກທີ່ໄດ້ກາຍເປັນ 1 ໃນ 7 ສິ່ງມະຫັດສະຈັນທຳມະຊາດໃໝ່ຂອງໂລກ”.

ດ້ວຍທ່າທາງສຸພາບ, ໃກ້ຊິດ ແລະ ບໍລິການດີຂອງຜູ້ບໍລິຫານທ່ອງທ່ຽວ ແບບອາຊີບ, ອ້າຍ ເລຊວນຮວ່າ ຢືນຢັນວ່າ “ ປ່ຽນແປງຫຼາຍແລ້ວໄດ໋, ຫຼາຍປີກ່ອນ, ນັກທ່ອງທ່ຽວມາແຫ່ງນີ້ ມັກນັ່ງເຮືອໄປທ່ຽວເກາະ ແລະ ຖ້ຳຢູ່ຕາມພູເຂົາກາງອ່າວພຽງ 2-3 ແຫ່ງແລ້ວກໍກັບໄປພັກຜ່ອນຢູ່ແຄມຝັ່ງ ບາຍໄຈ໋. ດຽວນີ້ ເມື່ອມາ ຮ່າລອງ ນັກທ່ອງທ່ຽວຈະມີຫຼາຍລາຍການ ທ່ອງທ່ຽວເພື່ອເລືອກ, ພິເສດແມ່ນນັກທ່ອງທ່ຽວສາມາດນອນພັກຜ່ອນ ຢູ່ກາງອ່າວຮ່າລອງ ເທິງກຳປັ່ນທ່ອງທ່ຽວທີ່ທັນສະໄໝ ຫຼື ເກາະຫຼາຍແຫ່ງ ດ້ວຍບໍລິການທ່ອງທ່ຽວແບບຄົບວົງຈອນ”.

ກຳປັ່ນຂອງພວກຂ້ອຍຈອດຢູ່ກາງອ່າວຮ່າລອງ, ອ້ອມຂ້າງແມ່ນກຳປັ່ນຫົງ ລຳຕ່າງໆ ທີ່ມີຊື່ແຕກຕ່າງກັນ. ໃນຍາມສາຍັນ, ພວກຂ້ອຍລົງເຮືອຈັກລຳໜຶ່ງ, ນີ້ເປັນພາຫະນະທີ່ນຳໃຊ້ເພື່ອຮັບໃຊ້ການໄປມາ ຢູ່ເທິງອ່າວ ລະຫວ່າງກຳປັ່ນທ່ອງທ່ຽວ ແລະ ບັນດາສະຖານທີ່ີທ່ອງທ່ຽວ. ຫຼັງຈາກເດີນເຮືອຈັກພຽງ 5 ນາທີ, ພວກຂ້ອຍໄປເຖິງຖ້ຳ ສຶງໂຊດ, ນີ້ເປັນ 1 ໃນບັນດາຖ້ຳທີ່ສວຍງາມ ແລະ ກວ້າງໃຫຍ່ທີ່ສຸດຢູ່ເທິງອ່າວ. ຄົນຝຣັ່ງໄດ້ຄົ້ນພົບຖ້ຳແຫ່ງນີ້ ເມື່ອປີ 1901, ຖ້ຳ ສຶງໂຊດ ເປັນໜຶ່ງໃນບັນດາ ຖ້ຳ karst ທີ່ເປັນແບບຢ່າງ, ມີຄຸນຄ່າທາງດ້ານວິທະຍາສາດສູງ.
ດ້ວຍເນື້ອທີ່ລວມກວ່າ 10.000 ຕາລາງແມັດ, ຖ້ຳສຶງໂຊດເບິ່ງເໝືອນດັ່ງໂຮງລະຄອນດົນຕີປະສານສຽງແຫ່ງໜຶ່ງຢູ່ເທິງອ່າວຮ່າລອງ. ມາແຫ່ງນີ້ ນັກທ່ອງທ່ຽວບໍ່ພຽງແຕ່ຮູ້ສຶກປະທັບໃຈຕໍ່ຄວາມສວຍງາມທີ່ແປກປະຫຼາດຂອງຫີນງອກ, ຫີນຍ້ອຍທີ່ປະເສີດເທົ່ານັ້ນ, ຫາກຍັງນິຍົມ ຊົມຊື່ນນັບທັງຄວາມກວ້າງໃຫຍ່ໄພສານ ແລະ ມະຫັດສະຈັນທີ່ທຳມະຊາດບັນດານໃຫ້ແກ່ມະນຸດອີກດ້ວຍ.
ເຮືອຈັກພາພວກຂ້ອຍໄປຍັງເກາະ ຕີຕົບ, ທ້າວ ເລຊວນຮວ່າ ບອກວ່າ “ອາກາດຍັງດີຢູ່, ພວກອ້າຍຂຶ້ນຈອມພູຖ່າຍຮູບແລ້ວຈຶ່ງລົງໄປລອຍນ້ຳ ກໍໄດ້”. ຫາດຊາຍຮາບພຽງດີ, ນ້ຳຂຽວງາມ,ໃສສະອາດ, ກຳປັ່ນສີຂາວຫຼາຍລຳກຳລັງເດີນຢູ່ເທິງທະເລ, ອົດໃຈບໍ່ໄດ້, ຫຼາຍຄົນພາກັນລົງໄປ ອາບນ້ຳທະເລ. ສຸດທ້າຍພວກຂ້ອຍຕ້ອງແຍກກັນ, ອ້າຍນ້ອງນັກຖ່າຍຮູບຈຳນວນໜຶ່ງພາກັນຂຶ້ນພູສູງ, ທາງຂຶ້ນພູໄປຕາມຂັ້ນໄດທີ່ກໍ່ດ້ວຍຫີນ ແລະ ເລັດລອດໃຕ້ຮົ່ມໄມ້ທີ່ຂຽວງາມ. ຜ່ານການພັກຜ່ອນ 2-3 ເທື່ອ, ພວກຂ້ອຍຈຶ່ງໄດ້ຖ່າຍຮູບ. ບັງເອີນຂ້ອຍຄິດເຖິງຄຳແນະນຳ “ຄວາມງາມຂອງຮ່າລອງໄດ້ຮັບການສ້າງຂຶ້ນດ້ວຍ 3 ປັດໄຈຕົ້ນຕໍຄື: ຫີນ, ນ້ຳ ແລະ ທ້ອງຟ້າ”. ຄວາມຈິງກໍເປັນແນວນັ້ນແທ້! ລວດລາຍ, ສີສັນຂອງພູເຂົາ, ຂອງກຳປັ່ນສີຂາວ, ຂອງໃບເຮືອສຳເພົາສີແດງປະສົມກົມກຽວກັບກຸ່ມເມກ ແລະ ນ້ຳທະເລສີຂຽວໄດ້ສ້າງເປັນຮູບແຕ້ມແຜ່ນ ໜຶ່ງທີ່ງົດງາມ. ສົມກັບຄຳຂະໜານນາມວ່າເປັນເມືອງທ່ອງທ່ຽວທີ່ແສນປະທັບໃຈດ້ວຍ ບັນດາຮູບພາບກຳປັ່ນສີຂາວຫຼາຍລຳ-ຫົງຂາວຝູງໜຶ່ງ ລ່ອງລອຍຢູ່ກາງອ່າວຮ່າລອງ. 
ໃນຍາມຄ້ອຍຄ່ຳລົງແລງ, ພວກຂ້ອຍຂຶ້ນໄປຊັ້ນດາດຟ້າເຮືອກິນເບຍ ແລະ ຊົມເບິ່ງແສງອາທິດໃນຍາມສາຍັນ. ເວລານີ້ ທຸກຄົນຮູ້ສຶກຄື ໄດ້ເຈືອຈານເຂົ້າກັບພາບພົດທຳມະຊາດແຫ່ງໜຶ່ງທີ່ມີຄວາມສວຍງາມດັ່ງໃນຝັນ. ບັນຍາກາດຢູ່ທະເລໃນຍາມຄ່ຳຄືນເຕັມໄປດ້ວຍຄວາມ
ສະຫງົບງຽບ ແລະ ບໍລິສຸດ, ລົມພັດມາຄ່ອຍໆ, ບາງທີ່ໄດ້ຍິນສຽງຟອງນ້ຳຕີໃສ່ຂອບເຮືອ. ເຮັດໃຫ້ຈິດໃຈຄືດັ່ງເລື່ອນລອຍພາຍໃຕ້ແສງເດືອນ ທີ່ໃສສ່ອງສຸດແສນສວຍງາມ.
ຕ້ອນຮັບອະລຸນວັນໃໝ່ຢູ່ທ່າມກາງອ່າວເຮັດໃຫ້ເກີດຄວາມຮູ້ສຶກສະບາຍໃຈ. ກຳປັ່ນ ບ່າຍເທີ ຄ່ອຍໆ ເດີນເຂົ້າຝັ່ງທະເລ, ທຸກຄົນເລີ່ມ ມອງເຫັນນະຄອນ ຮ່າລອງ ທີ່ສວຍງາມ ແລະ ທັນສະໄໝ. ຈັບມືອ້າຍນ້ອງກັບຕັນ ແລະ ລູກເຮືອ, ພວກຂ້ອຍຜູ້ໃດກໍຮູ້ສຶກເສຍດາຍ. ໂບກມືອຳລາກັນ, ທ້າວ ເລຊວນຮວ່າ ເວົ້າຕື່ມອີກວ່າ “ພົບກັນໃໝ່ເດີທຸກຄົນ! ຮ່າລອງ ທີ່ສວຍງາມຍັງມີສິ່ງທີ່ໜ້າຈັບໃຈຫຼາຍໆ ໄດ໋”.
ຖືກແລ້ວ, ສະພາບແວດລ້ອມທີ່ສົດໃສ, ລະບົບນິເວດວິທະຍາທີ່ຫຼາກຫຼາຍຊະນິດ, ເຂດທ່ອງທ່ຽວທຳມະຊາດຫຼາຍແຫ່ງ, ພ້ອມກັບນາມມະຍົດ ຕ່າງໆ ທີ່ຍາດໄດ້, ອ່າວຮ່າລອງ ພວມກາຍເປັນຈຸດນັດໝາຍທີ່ດຶງດູດໃຈນັກທ່ອງທ່ຽວທັງພາຍໃນ ແລະ ຕ່າງປະເທດຢ່າງຫຼວງຫຼາຍ.
Visit Ha Long in Quang Ninh: ອ່າວຮ່າລອງ ທີ່ໜ້າຈັບໃຈ

ຕິດຕໍ່ ແລ PHANANGHONGTRAVEL
1. ຕິດຕໍ່ ແລ: (+85)62022545777.
2. Facebook: ກົດທີ່ນີ້
3. ອີເມວ: 
Ideasaobang2007@gmail.com
ຢ້ຽມຢາມ ແຂວງຜົ້ງສາລີ  ຄລິກທີ່ນີ້   ຫຼື  ຄລິກທີ່ນີ້ (Facebook)

0 Comment :

Post a Comment